المساعد الشخصي الرقمي

مشاهدة النسخة كاملة : (عريضة مقدمة إلى السيد عميد الكلية) تقييم نظام الدراسة في شعبة اللغة الإنجليزية



د/سالي جمعة
09-10-2007, 07:45 AM
(عريضة مقدمة إلى السيد عميد الكلية )

تقييم نظام الدراسة في شعبة اللغة الإنجليزية

إلى السيد عميد الكلية

الأستاذ الدكتور\ السيد أحمد عبد الخالق

تحية طيبة وبعد ...

أقدم لسيادتك من خلال هذه العريضة شكر , شكوى , وجهة نظر

وما شجعني على ذلك هو تعيين سيادتكم عميدا للكلية وسيادتكم من أقترح إنشاء هذه الشعبة وكان مسئولا ووكيلا لشعبة اللغة الإنجليزية .

عندما ذهبت أول يوم إلى الكلية , التحقت بنظام الشعبة الإنجليزية وحضرت أول محاضرة وكانت للأستاذ الدكتور السيد عبد الخالق والذي قابلنا بابتسامته الصافية المعهودة وغمرنا بروح الأب الحنون ,مما دفعني وشجعني على إستكمال الدراسة في الشعبة بل والكلية بأكملها , وخاصة بعد أن رسم أمامنا طريقا من الأمل والعزم والعمل والنجاح والتفاؤل والمستقبل المشرق...

ولكن سرعان ما تبددت كل هذه الآمال وتحطمت على صخرة الاضطهاد من بعض الأساتذة فمع توالي السنوات الدراسية أخذ ينهال علينا البعض منهم بوابل من كلمات الإحباط والذم والشفقة علينا مما نحن فيه (ماذا بنا يا سيدي الفاضل ؟!) , فنحن بالنسبة لهم فاشلون ولم ولن نحقق النجاح طالما نحن ملتحقين بالشعبة , حتى أن البعض صرح بكرهه الشديد لنا , ومن المؤكد سيادتك لا ترضى لنا بهذا الإحباط والذي يتنافى مع دور الأساتذة في تشجيع الطلبة وأعطائهم الدفعة والحماس للدراسة والنجاح , وأكرر ليس جميع الأساتذة ولكن قلة منهم , على خلاف البعض الآخر الذين يتعاملون معنا بالحسنى وروح الأب والأخ بل والصديق .

وحقيقة نظام الشعبة ليس بكل هذا السوء فله مميزات عدة , بالإضافة إلى بعض العيوب , وسأتعرض لبعض المميزات كالآتي :

1- قلة العدد , فتشعر وكأنك في درس خصوصي .
2- الارتياح النفسي للأساتذة والطلاب على حد سواء نتيجة هذه القلة .
3- هدوء المحاضرات مما يزيد من محصلة الطلاب واستيعابهم الجيد للمحاضرة .
4- تشجيع الأساتذة على التفاعل مع الطلبة وإطلاق المناقشات والأسئلة .
5- استخدام أحدث وسائل التكنولوجيا في شرح المحاضرات وتوصيل المعلومات .
6- نظام امتحانات الميد ترم mid-term والذي يساعد الطلبة على المذاكرة أولا بأول , وإن بدأ هذا النظام يصبح نقمة على الطلبة بعد أن كان نعمة كبرى نظرا لجعل الامتحانات يوميا على مدار أسبوع كامل أو أكثر مما يضعف من قدرات الطالب ويسبب له احباطات كثيرة .
7- نظام الساعة المكتبية الذي يعطينا فرصة أكبر للنهل من علوم الأساتذة ومعارفهم .

ومميزات أخرى لا تسعفني ذاكرتي لسردها , وكأي شىء في هذا الوجود لا يتصف بالكمال ولابد أن تكون له بعض العيوب وذلك نظرا لحداثة نشأة هذا النظام , ومن هذه العيوب :

1- بعض الأساتذة المنتدبين من الجامعات الأخرى للتدريس لنا , على خلاف أساتذة جامعة المنصورة – لا يتمتعون بالروح التي تجذب الطالب لسماع المحاضرة , وذلك لان بعضهم طاعن في السن , كذلك ملكة تسهيل وصول المعلومات الى أذهان الطلبة ,و خاصة أنهم يدرسون مواد اللغة الإنجليزية .
2- الكتب الدراسية لهؤلاء الأساتذة معقدة للغاية وغالبا ما تكون كتب أساتذة أجانب .
3- تقسيم بعض المواد إلى قسم عربي وقسم أجنبي , مما يساهم في تشتيت ذهن الطالب .
4- المحصلة النهائية من المادة العلمية واللغة الأجنبية ليست كما يجب أن تكون (وهذه هي دائما نقطة الانتقاد الموجهة لنا من الأساتذة, فدائما يقولون لنا أنتم لم تستفيدوا لا لغة ولا مادة علمية ) ومع ذلك -من وجهة نظري- لا بأس بهذه المحصلة , ففي النهاية لا يتساوى خريج الشعبة الإنجليزية مع الشعبة العامة من ناحية اللغة , كذلك هو حال طالب الشعبة العامة فلا يخرج بالنتاج العلمي الكاف , ومن المعروف والمؤكد بأن العيب يكمن في الطالب وليس الأستاذ , ولتوضيح أكثر – منعا للفهم الخطأ– أن الطالب في الشعبتين على حد سواء يخرج لا يتذكر شيئا مما درسه في الكلية على مدار السنوات الأربع وغير متأهل بما يكفي للخروج للحياة العملية وهذا على مستوى جميع الكليات والجامعات في العالم العربي .

هذه فقط المساوئ من وجهة نظري ومقارنة بالمزايا فهي قليلة وحلولها بسيطة وتحتاج إلى إعادة نظر وعلى الرغم من أن نظام الشعبة الإنجليزية لدينا بكلية الحقوق – جامعة المنصورة حديث النشأة على خلاف جامعة القاهرة والإسكندرية , فأن النظام لدينا أفضل حالا منهم وهذا باعتراف أساتذة هذه الجامعات خصوصا في نظام امتحانات الميد ترم , لأن الكلية لدينا تهيأ جوا متماثلا لا يسمح بالغش ويتميز بالرقابة الشديدة من الأساتذة والعاملين بالكلية خلاف جامعة القاهرة فقد صرح لنا أحد الأساتذة بأن الطلبة يتم امتحانهم في أماكنهم بالمدرجات بجوار بعضهم البعض دون أي مسافات كنظام المحاضرة , مما يسمح بالغش ولا يجعل للامتحان أية قيمة , وتفاجأ بشدة عندما علم بالنظام لدينا وأشاد به كثيرا .


وفي النهاية , أتقدم بالنيابة عن طلبة الشعبة الإنجليزية بتقديم خالص الشكر والتقدير للأستاذ الفاضل الدكتور السيد أحمد عبد الخالق لإتاحته لنا هذه الفرصة وخوض هذه التجربة العظيمة مصدر الفخر لنا ونقول له سيادتك دائما رمز الإبداعات والتطور والتجارب العظيمة , نتمنى لسيادتكم المزيد والمزيد من النجاح والتوفيق .


وكل عام وأنتم بخير .


ملحوظة لطلبة الشعبة الإنجليزية : -
وقع على هذه العريضة بالموافقة حتى تمثل صوت طلبة الشعبة الانجليزية للسيد عميد الكلية , وإضافة أية شكاوى أخرى حتى تأخذ بعين الأعتبار والنظر فيها من قبل سيادته .


الإمضاء \

سالي جمعة

ليسانس الحقوق - شعبة اللغة الإنجليزية 2007

د رشا على الدين
09-10-2007, 05:32 PM
انا أول الموقعين
د رشا على الدين

محمود حجازى
09-10-2007, 08:50 PM
بالنسبة للعيوب التى نعانى منها عامة فهى كما وضحتها الزميلة الفاضلة فى العريضة .
بالاضافة الى عدم استقرار جدول المحاضرات فنجد احيانا ترحيل محاضرة ما الى يوم اخر وميعاد جديد بخلاف ما هو وارد بجدول المحاضرات وقد يحدث احيانا ان يتم الاعلان عن هذا التغيير فى وقت قد لا يتمكن الجميع من معرفته مما يؤدى الى حدوث بلبله وعدم استقرار

وتعقيبا على النقطة التى ذكرتها الزميلة بخصوص الاضطهاد فنحن نتعرض الى الاضطهاد من جانب بعض الاساتذة فالبعض يدخل من اول محاضره يبين لنا هذا الموقف ويردد الجملة الشهيره المعروفة لنا والتى نسمعها كثيرا من بعض الاساتذه وهى (ولا انتوا معاكم لغة ولا انتوا بتدرسوا قانون) وبناء على هذا الكلام فلما نحن فى الكلية اذن.

واخيرا لا ننسى دور الاستاذ الدكتور /السيد احمد عبد الخالق فى انشاء شعبة اللغة الاجنبية فله منا جزيل الشكر والعرفان
ونحن على ثقة بانه سيواجه هذه العيوب وسيعمل على اصلاحها داعين الله له بالتوفيق .

ومن هنا اضيف توقيعى على هذه العريضة
محمود حجازى

not4sale
10-10-2007, 01:32 AM
بالتاكيد اوقع على العريضة


واحب اضيف بقى عيب كمان ان فى بعض الدكاترة(بدون ذكر اسماء طبعا)للاسف اللغة عندهم ضعيفة جدا, وخصوصا النطق, او الشرح باللغة الاجنبية
وبما اننا بقى جينا لموضوع اللغة
نفسى اعرف ايه السبب ورا قرار تدريس اللغة الاجنبية للشعبة عن طريق دكاترة الكلية, انا مش قصدى طبعا الاساءة لدكاترة الكلية, هما دكاترة واعلام فى موادهم, بس بالنسبة للغة الاجنبية, اعتقد ان المستوى بتاع الطلبة اللى درسلهم دكاترة زى الدكتورة اسماء الشربيى-كلية اداب او الدكتور اسلام الصادى -كلية اداب, احسن من اللى درسلهم دكاترة من الكلية
وده بصراحة عن تجربى شخصية لانى جربت الاتنين, وجربت دكاترة الكلية
وده زى ما قلت مش لعيب فى دكاترة الكلية ولكن لانه مش تخصصهم, وبصراحة مافيش حد يقول ان طالب فى الفرقة الثانية شعبة انجليزى تبقى اللغة بتاعته am is are!!!!!




والنقطة بقى اللى بصراحة شايفها اهم من دول

موضوع المصاريف العالية جدا اللى بتزيد سنة عن التانية وفلوس الكتب
الشعبة فى اولها مصاريفها كانت بين 1500 و 2000 جنيه, وكانت الاعداد اقل من دلوقتى تقريبا النص او التلت
دلوقتى ومع الزيادة المستمرة فى الاعداد(سواء المستجدين او الباق للاعادة)مصاريف الشعبة وصلت 3000 جنيه, ده غير ان الطالب بيدفع مصاريف الكلية اللى بقت فى حدود 140-145 جنيه
وطبعا فى ناس كتير مابتعرفش تدخل الشعبة عشان المصاريف العلية دى, وفى ناس فيها وربنا وحده يعلم بيدفعوا المصاريف دى ازاى(انا اعرف ناس فى الشعبة فعلا يوم دفع مصاريف الشعبة دى ممكن يقعد البيت عندهم شهرين تلاتة فى حالة مادية صعبة) بس هما نفسهم فى تعليم متميز نسبيا لاولادهم

وبالنسبة للكتب , انا ليه ادفع فى كتاب 40 او 50 جنيه فى حين ان طالب الشعبة العامة بيشتريه ب 15 او 20 جنيه؟عشان هما الكتاب بتاعهم مدعم؟ طب هو بيدفع 140 جنيه مصاريف, انا بدفع 2000 او 3000 جنيه مصاريف, يعنى لو الدعم ده من المصاريف يبقى المفروض الكتب تبقى مجانا لبتوع الشعبة قياسا على المصاريف او على الاقل تبقى فى سعر الكتاب بتاع العربى, ولو الميزانية المخصصة لدعم الكتاب محددة, طب الدعم يبقى يتوزع على اكثر من عشرين الف طالب فى الشعبة العامة, والشعبة الاجنبية مايكلموش اساسا الف واحد؟




بالنسبة بقى لنظام اختيار الطلبة اللى هايلتحقوا بالشعبة ويدرسوا فيها


الشعبة دى معروف ان هدفها تقديم تعليم متميز وتخريج طالب على مستوى عالى ومتميز ومعاه مهارات زى اللغة وكده
لما الطالب ده يكون اساسا درجة اللغة الانجليزة عنده قليلة ويدخل شعبة, مع ان طالب الشعبة المفترض فيه التميز, يعنى اقل درجة انجليزى ممكن تدخله شعبة 45 و45 دى قليلة اوى كمان بالنسبة لواحد هايدرس باللغة طول الاربع سنين والمفروض ان اللغة دى الحاجة اللى بتميزة عن الطالب العادى


وانا بصراجه باقترح بالنسبة لنظام الاتحاق بالشعبة انها تتم كالأتى: اولا تكون درجات اللغة فى ثانوى عالية
ثانيا: يكون الاتحاق بنظام المقابلة الشخصية, لقياس القدرات الحقيقة للطالب ومدى احقيته للدرجة المتميزة والتعليم المتميز اللى هايخده فى الشعبةو وعشان نقلل الاعداد , عشان الاستيعاب يزيد
ممكن كمان يتم عقد امتحانات زى امتحانات قدرات وملعومات عامةزى مثلا اللى بيتعمل للطلبة اللى هاتدخل فصول المتفوقين فى مدراس ثانوى او غيرها
ثالثا : بالنسبة بقى للدراسة, ليه مايبقاش فى شغل عملى للطلبة( زى مثلا مشروع المحكمة التجريبية virtual court اللى شرفت بتقديمه لسيادة العميد)

وليه كمان مايبقاش فى امتحانات شفوية تقيس مدى فهم الطالب فعلا للمناهج اللى درسها, ومستواه فى اللغة كنطق وتعامل وخلافه



يا جماعة الشعبة دى المفترض فيها انها كيان متميز, عايزينها تبقى فعلا متميزة من جميع الجوانب, والا بصراحة تبقى زى عدمها وعربى احسن!


اسف جدا للاطالة

د/سالي جمعة
10-10-2007, 04:07 AM
هناك أيضا فكر سائد في الكلية ويشكك في نزاهة الأساتذة والعاملين في تصحيح الأمتحانات - ونعترض على ذلك بشدة - وهو أننا ننجح ونحصل على أعلى التقديرات بما ندفعه من مال , متناسين أن الغالبية من طلاب الشعبة ملتحقين بنسب مرتفعة تتعدى 90% أدبي و 95% علمي في الثانوية العامة , وتجمعت هذه القلة في مكان واحد مما ساهم في تميز الشعبة بالدرجات والتقديرات العالية , خلاف طلبة الشعبة العامة فمعظمهم ملتحقين بنسب قليلة جدا 70% في الثانوية العامة بالأضافة إلى الأعداد المهولة من الطلبة في الفرقة الواحدة .

not4sale
10-10-2007, 11:33 PM
طبعا الكلام ده بنستثنى منى الدفعة اللى دخلت 2005/2006
اللى فى تالتة دلوقتى يعنى
بيتهيالى القر بتاع الكلية كله جه فينا!

SLAMONY
05-11-2007, 12:28 PM
انا اوقع معاكوا
و كل الكلام اللى قلتوه مظبوط جدا
و باريت نشوف حل فى موضوع الدكاتره اللى بيتحدونا ؟!!

legend
27-11-2007, 01:56 AM
أوقع طبعا ...وكلام مظبوط جدا ويمثل مشكله لكل طلبه الشعبه ...لكن هل لتلك العريضه تأثير ..؟

أنا بس هقول بعض المشاكل اللى عانيت منها بجد واتاثرت بيها اوى .

مشكله تقارب ايام الامتحانات بالنسبه للمد تيرم دى مشكله فظيعه ... الدكاتره مستهونين بالمد تيرم وبعضهم بيقولنا فى المحاضرات المفروض امتحان المد تيرم ده يبقى عادى يعنى تحضر محاضرتك وتنزل تمتحن وتانى يوم تيجى عادى وتمتحن ...ناقص يعملولنا الامتحانات كلها فى يوم واحد .. كاننا مدرسه ابتدائى ..

المد تيرم ده عليه 25% من الماده يعنى بتفرق فى التقدير وبتفرق انها بتريح فى الامتحان النهائى ..بتفرق مع الطلبه كتير على اختلاف مستوى الطلبه طبعا فى طالب الخمس درجات بالنسبه ليه يقرا كلمتين ويدخل ينجح وطالب تانى يفرقوا معاه من جيد جدا لامتياز ...

لازم يبقى فى فتره بين الامتحانات مش لازم تبقى اسبوع بالظبط ...
لان المواد كبيره ومرهقه فى مذاكرتها ومش هقول انها بتتذاكر لاول مره لا طبعا ..
لو حتى مراجعه بتبقى مرهقه والطالب بيوصل بعد امتحانين او تلاته ويلاقى نفسه خلاص مش قادر عاوز يريح ولو يوم واحد بس مفيش مجال .. وبيضطر يذاكر غصب عنه ومفيش طاقه نفسيه أو ذهنيه أو جسديه للمذاكره ... بيذاكر وهو تعبان ومرهق ومفيش تجميع نهائى ... وبالتالى جزء من درجه الماده بيضيع ...


موضوع تانى ياريت الدكاتره يعرفوه لان معتقدش ان فى دكتور من الدكاتره يفقه عنه شىء ..
موضوع ان الطلبه قاعدين زى الدسكات اللى قاعدين عليها مبيتكلموش , مبيتناقشوش , مبيجاوبوش
كتير من الطلبه بيبقى عاوز يتكلم او يجاوب او يناقش دكتور بس بيخاف او زى مابنقول بيكبر دماغه .. لانه خايف الدكتور ياخد باله منه ويحطه فى دماغه ...

لان اسهل حاجه عند اى دكتور هات كارنيهك وده طبعا بالنسبه للمناقشه او ابداء الراى الخاص بالطالب..
أواستنانى بعد المحاضره .. سواء الدكتور هيعمل حاجه او لا بس بيعيش الطالب فى قلق طول الترم وبعض الاوقات احباط للطالب لتصوره انه شايل الماده شايلها ..

نقطه تانيه برده ياجماعه ودى انا شفتها بنفسى واتضايقت منها جدا واحبطتتنى من الكليه .. موضوع تمييز بعض الدكاتره لطلبه على طلبه ..او بمعنى اصح تمييز اولاد الدكاتره على الطلبه العاديين ...طبعا الموضوع ده نادر .. بس انا حصل ليا موقف ..
طبعا بدون ذكر اسم دكتور انا هذكر الموقف بس ..(بعد احدى المحاضرات كنت محتاج انى اسال الدكتور سؤال هام جدا جيت اساله قالى "مش فاضى دلوقتى " انتهى الحديث معاه .. ولم يتحرك خطوه وجاء زميل لى ولكن ابن دكتور وساله سؤال وكان الجواب فى خلال نصف ساعه امامى واخبر الدكتور الطالب زميلى بان يتصل به على تليفون بيته ليكمل اجابه السؤال والشرح.

انا ميهمنيش انه يكلمه او ميكلموش او يبقى فى تمييز او لا ميهمنيش انا اللى يمهنى انى لما اسال حاجه اجد اجابه فوريه ..ولو مفيش وقت يبقى لينا كلنا .. فقط تجنبا (للاحباط).

موضوع آخر

مفيش اى انشطه اجتماعيه تجمع بين الطلبه برغم العدد الصغير ... والطلبه فى الدفعه متعرفش بعضها وكل جزء فى جانب مفيش وحده بين الطلبه وده ناتج ان مفيش اى انشطه بينهم غير المحاضرات اللى بيخرج الكل منها تعبان مرهق هلكان عاوز ينام ده ان منمش اصلا فى المحاضره من كتر كلام الدكتور اللى مش مفهوم اللى بينيم الدسكات اللى فى المدرج ....
ضرورى يكون هناك انشطه تجمع بين الطلبه ..انشطه جذابه تجذب جميع الطوائف من الطلبه مش طائفه دون الاخرى ....
وياريت محدش يرد عليا ويقولى اتحاد الطلبه لان الاتحاد اغلب دفعه انجليزى ميسمعوش عنه حاجه ومحصور على ناس معينه معروفه ..

اى انشطه تخلى الطالب نازل الجامعه فرحان مش نازل الجامعه كاره حياته وكاره الجامعه وكاره الدكاتره نازل علشان الغياب وعلشان ياخد الكلمتين المهمين من الدكتور وينجح وبعد كده ميهوبش نحيه الجامعه تانى .


ياريت ياجماعه برده تذكروا فى العريضه موضوع تغيير طريقه شرح الدكاتره لان المواد لذيذه والشرح بيكره اى طالب فى الماده وبيذاكرها رغم عنه علشان كده بيتخرج بينسى كل حاجه .. او بيقفل ورقته ويسلمها للملاحظ بينسى كل حاجه فى الماده ...


طبعا اغلب العيوب دى فى الجامعه كلها وفى نظام التعليم عموما بس على الاقل نحاول نغير منها بحيث نجعل الشعبه مثال يحتذى به .

not4sale
02-12-2007, 06:24 PM
ليجند
بجد كلامك من الاخر
فعلا موضوع مواعيد امتحانات الميد تيرم ده فعلا مرهق , وخصوصا لو الطالب مثلا من النوع (زى اغلبنا اساسا)اللى بيذاكر بالليل ويسهر لتانى يوم الصبح, والمفروض انه يروح يمتحن عشان يرجع يلحق ينام عشان يادوب يسهر يراجع على الجزء المقرر, خصوصا ان فى مواد الجزء المقرر للميد تيرم فهيا كبير , مابيكفيش ابدا يوم ونص ليها

اما بقى بالنسبة لان الدكاترة مش بيشجعوا الطلبة على المشاركة فى المحاضرة, اولا بس احب اقول ان مش كله , فى دكاترة محترمين جدا, زى الدكتور سيد عبد الخالق او الدكتور شوقى ابو خطوة, محاضرتهم قائمة اساسا على المشاركة بين الطالب والدكتور, والمناقشة وتشغيل المخ, بس فى دكاترة تانيين للاسف, بيدخل الساعتين (يرزع) الكلمتين اللى فى الكتاب ودمتم, وطبعا قابلونى لو هو نفسه استوعب حاجة

اما بقى نقطة تمييز بعض الطلبة على حساب البعض الاخر, فزى مانت قلت, يااما الدكتور يبقى مشغول على الناس كلها, ياما لو عايز يجامل او يكرم حد , يبقى يكرم الكل, ماحنا برضه ولاد ناس يعنى



والنقطة الاخيرة بالنسبة لعمل نشاط اجتماعي يجمع بين الطلبة وبعضها, خصوصا ان العدد صغير وسهل اوى يبقوا مجموعة واحدة , فاعتقد ان الحل بيكون فى تكوين اسر طلابية , عمل رحلات, حفلات زى حفلة التخرج للفرقة الرابعة
او اى نشاط طلابي اخر, ومش لازم يبقى ترفيهي,يعني في مثلا مشروع كنت قدمته للعميد خاص بانشاء محكمة تجريبية, طلبة الشعبة او طلبة الفرقة الرابعة بالكلية عموما يتدربوا فيها على مهارات الدفاع والادعاء , والمحاكمات, ودي طبعا حاجة هتجمع طلاب كتير, على اساس انها تهم الجميع


ياريت بس صوتنا يوصل للدكاترة ولمجلس الكلية, وياريت لما يوصل نحس ان في تغيير فعلا

د/سالي جمعة
03-12-2007, 08:20 PM
أعتقد الأسم الأصح حاليا للموضوع عرائض وليس عريضة !

شكرا على تفاعلكم ونأمل أن يصل صوتنا للسيد عميد الكلية أستاذنا الجليل السيد أحمد عبد الخالق ونجد حلول فعلية لهذه المشاكل قبل أن تتفاقم .

تمنياتنا له بالنجاح الدائم

namera
19-06-2008, 10:36 AM
اشكر مقدم العريضة بس احب اضيف عليها نقطة مهمة ممكن كتير يخاف يقولها او ميعرفهاش هى تمييز اولاد الاساتذة واولاد المستشارين بدون ذكر اسماء بس فى اولاد مستشارين بيجلهم التقدير والامتحان كمان كل اللى عندهم انهم اولاد مستشارين وبعلاقتهم ببعض الدكاترة علاقات شخصية ده لوحده تقدير رغم ان الادهم لاحضور ولا حتى حل والله اعرف بنت مستشار كانت رافضة النجاح لان الوالد المستشار عايز كدة جبلها التقدير
علشان طبعا النيابة وادى القضاء والنزاهةواللى ممكن تحكم علينا ادام يارب الاقى رد يمنحنى الثقة والامان

hazem mamduh
07-10-2008, 03:49 PM
اوافق على هذه الاراء البنائه والتى تسهم وبشكل كبير فى رفع مستوى الكليه بين الكليات المصريه

علاء الشرقاوى
15-03-2009, 11:41 PM
انا يا جماعه اتخرجت بس الموضوع شدني واحب اقول ان اهم حاجه بجد هي اختيار الدكاتره والاساتذه اللي بتدرسلنا لان فيه دكاتره بتبقه نفسيتها معقده وبتحب تعقد في الطلبه (واسالو خريجي 2008 عن الدولي) وعلي العكس تماماتلاقي دكاتره بتعامل الطلبه بحب وكانهم اولادهم او اخواتهم وانا رايي ان مش اي دكتور ينفع يدرس لطلبه الشعبه

good_2020
18-03-2009, 03:27 PM
انا عايز اعرف اماكن عمل المحامين الانجليزي في مصر
ومستقبلهم والفرق بينهم وبين العربي يعني تستحق التعب والمصاريف
وشكرا ليكم

الخبراليقين
24-05-2009, 07:45 AM
نفس الكلام ينطبق علي جامعة عين شمس لدرجة شعوري بانها جامعة عين شمس القسم الانجليزي نفس العيوب ونفس المميزات