يااهل الله راح فين الطرَب
يااهل الله راح فين الطرَب
معرفش ليه الذوق هَرَب .... إيه اللي كان بس السبب
اللحن كان مليان شجن ........ لأغاني موزونه بدهب
الكلمه كانت سيِّده ................. فيها المعاني الجيِّده
عايشه ف قلوبنا وخالِده ....... علشان جميله وبالأدب
يااهل الله فين الطرب
المُطربين كان معدودين ............ ولفـَنـُّهُم مِتعَبـِّدين
بتراعي ذوق المُستمِّع .......... وكأنه له عندها دين
الغنوه تاخد حقـَّها .......... بروفات كتير على لحنها
تـُخرُج دُرر من بُقـَّها .......... يسمع لها كل العَرَب
يااهل الله فين الطرب
أسماء كتير مبتِتنسيش ....... قِدِرت ما بينا كتير تعيش
لكن النهارده المطربين ....... فيهم أصيل؟ .. لأ متلاقيش
وكمان عَددهم في اللمون .. من أجل فرصه كل شيء يهون
يكـْدِب ينافِق أو يخون ...... ويطاطي لو حتىَ انضـَرَب
يا اهل الله راح فين الطرَب
الصوت يغنـِّي ومش جميل .... بسماجه م الوزن التقيل
واللحن واحد للجميع ............. تخبِّيط ورزع يهد الحيل
يرقص يميل زي البجَع ......... وينـُط زي اللي انسَرَع
وكأنه محروم وانفـَجَع ......... أو جسمُه مليان بالجَرَب
يااهل الله فين الطرب
اليوم بنِسْمَع في السُباب ....... حاجه تجيب حتى اكتِئاب
والزنْ في ودان الشباب ...... خلـَّىَ المزاج زي الهـِباب
بهَرُوا العيون بالمسخره ......... خلـُّوا الكليبات مُبهـِره
لقطات رخيصه وفاجـِره ....... وحاجات كِدا قِلـِّة أدب
يااهل الله راح فين الطـَرَب
فين لما كان المطربين ......... والجَد مرسوم ع الجبين
واقفين أمام الميكرفون .... لا يرُوحوا لا شمال أو يمين
واللِبس حِشمه ومُحترم .......... والوقفه بشموخ كالهَرَم
والرأس مرفوعه بشمم ... والصوت يا سبحان مِن وهَب
يااهل الله راح فين الطـَرَب
وبكل رقـّه وبالحنان ................ الفن يسْري في المكان
والصوت يغرَّد في الودان .. صوت ثومه أوصوت أسمهان
أو شاديه أو عبد الحليم ........ أصوات من النوع الرخِيم
مِتأسِسَه تأسِيس سليم .............. يرحم أصالتك يا عبدالمطِلِب
يااهل الله راح فين الطـَرَب
واللي كتب أحلى الكلام ........... شـُعَراء كبار كانوا كِرام
بيألـِّفوا بإحساس جميل ........... مش أي حاجه والسلام
رامي يقول رق الحبيب ......... وشفيق يقول ياما قلوب
كامل يقول لا تكذبي ........... وعزيز بأحلى ما انكـَتـَب
يا اهل الله راح فين الطـَرَب
اليوم تلاقي مؤلفين ............ جنب القهاوي مرطرطين
علشان يبيعوا شـُغـْلـُهُم ........... مع كل واحد كشكولين
وان جالـُه عابر للسبيل .... مُطرب مهوش فنـَّان أصيل
يديه كلام هايف هزيل ..... واهو يبقىَ مقلب وانشـَرَب
يااهل الله راح فين الطـَرَب
يدِّيها لمُلـَّحِن هَفـَق .......... عُمرُه ما في الوقت انزنـَق
ياخـُد الكلام ويلـَّحَنـُه ............ واللحن فورًا يندَلـَق
ياخده صاحِبنا وبالعَجَل ... من غير سؤال من غير جَدَل
يطلـَع يرُّصِلنا العَبَل ............ وبدون بروفه أو تـَعَب
يااهل الله راح فين الطـَرَب
تِلقىَ الكلام باكي وحزين .... معجون في هم ودمع عين
واللحن مُفـْرِح فيه صاجات ........ يقدر يرَّقـَص فرقتين
يبقى الكلام مليان دموع ....... واللحن فيه رقص وخليع
والميكرفون عمال يذيع ........... واحنا يموِّتنا الغـَضـَب
يااهل الله راح فين الطـَرَب
مُطرب يقول أكلِت دراعي .... والتاني في طريقـُه الزراعي
واللي امُّه سافرت يوم بحالـُه .... قال النهارده اليوم بتاعي
لم العيال وقلبها حفله ................ طبِّت عليه الأم غفله
كلمات أغاني كتير وسافله .... بتقول حاجات ليها العَجَب
يااهل الله راح فين الطـَرَب
شكله كده راح يتاخنق وانضرب
رد مع اقتباس
المشاركة الأصلية كتبت بواسطة mido1
مواقع النشر (المفضلة)